Innowasiýa ykdysadyýeti we startap-ekoulgamy ösdürmek boýunça maslahat geçirildi
Türkmenistanyň Bilim ministrliginde “Innowasiýa ykdysadyýeti we startap-ekoulgam” atly tegelek stol geçirdi. Bu çäre Milli Liderimiziň Türkmenistanyň Halk Maslahatynda beren tabşyryklarynyň ýerine ýetirilişiniň çäklerinde geçirildi. Milli Liderimiz öz çykyşynda ylmyň we innowasiýanyň ileri tutulýan ugurlary boýunça häzirki zaman bilim edaralaryny we tehnologiýa merkezlerini döretmegiň, şeýle hem ýokary okuw mekdeplerinde ylym-bilim we önümçilik arabaglanşygyny berkitmegiň netijeli usulyýetini işläp taýýarlamagyň möhümdigini nygtady.
Tegelek stola ýokary we orta hünär bilim edaralarynyň wekilleri, şeýle hem Türkmenistanyň Ykdysadyýetçiler bileleşiginiň agzalary gatnaşdy. Ara alyp maslahatlaşmagyň esasy maksady startap-ekoulgamy we innowasiýa ykdysadyýetini ösdürmek, şeýle hem zähmet bazarynyň häzirki zerurlyklaryny göz öňünde tutup bilim maksatnamalaryny kämilleşdirmek boldy. Talyplaryň telekeçilik başlangyçlaryny goldamak we ylmyň, bilimiň we önümçiligiň üstünlikli birleşmegi üçin şert döretmek meselesi ara alnyp maslahatlaşyldy.
“Dördünji senagat rewolýusiýasy” we emeli aňyň ykdysadyýetiň ähli ugurlaryna ornaşmagy bilen baglanyşykly kynçylyklara aýratyn üns berildi. Gatnaşyjylar depginli tehnologiki üýtgemeler şertlerinde zähmet bazaryndaky endiklere we hünärlere zerurlyklary çaklamagyň möhümdigini bellediler. Halkara Zähmet Guramasynyň bilim ulgamlaryny geljegiň talaplaryna uýgunlaşdyrmaga gönükdirilen tekliplerine seredildi. Hünärmenleri üstünlikli taýýarlamak üçin zähmet bazarynyň zerurlyklaryny seljerýän we çaklaýan Türkmenistanyň Zähmet we ilaty durmuş taýdan goramak ministrliginiň tejribesini öwrenmegiň zerurdygy bellenildi. Bilim maksatnamalaryny bu çaklamalara gönükdirmek derwaýys kärleri emele getirmegiň açary bolar.
Tegelek stoluň dowamynda uniwersitetleriň ýanyndaky startap-ekoulgamlaryny ösdürmek boýunça halkara tejribesi barada maglumatlar berildi we Türkmenistanda olary uýgunlaşdyrmagyň mehanizmleri teklip edildi. Gatnaşyjylar bilim edaralarynyň önümçilik bilen özara hereketlerini pugtalandyrmagyň usullaryny, şeýle hem talyplara nazary okuwy kärhanalarda amaly okuw bilen birleşdirmäge mümkinçilik berýän goşa bilim ulgamynyň ornaşdyrylmagyny ara alyp maslahatlaşdylar. Ýaş telekeçilere hukuk we maliýe goldawyny bermek, şol sanda ýeňillikli karzlar bermek we patentleri hasaba almak ýaly meselelerine aýratyn üns berildi.
Türkmenistanyň Bilim ministrligi Milli Liderimiziň tabşyrygyny ýerine ýetirip, 2026–2052-nji ýyllar üçin Türkmenistanyň ýokary bilimini ösdürmek strategiýasynyň taslamasyny taýýarlamagyň üstünde işleýär. Bu strategiýa Türkmenistanyň Halk Maslahatynyň indiki mejlisinde seredilmäge beriler. Resminamany taýýarlamakda tegelek stolda öňe sürülen ähli teklipler, şeýle hem öňdebaryjy halkara tejribesi göz öňünde tutular.
Strategiýanyň taslamasy okuw prosesini döwrebaplaşdyrmagyň esasy ugurlaryny öz içine alar, olaryň arasynda: ýokary okuw mekdepleriniň ýanynda innowasion bilim merkezlerini we barlaghanalaryny döretmek, startap-ekoulgamlaryny we talyplaryň arasynda telekeçilik medeniýetini ösdürmek, ylmyň we önümçiligiň birleşmegini güýçlendirmek, şeýle hem zähmet bazary ösdürmegiň çaklamalaryna gönükdirilen çeýe okuw meýilnamalaryny girizmek. Bilimi sanlaşdyrmak, ýokary tehnologiýaly pudaklar üçin işgärleri taýýarlamak we hünär derejesini üznüksiz ösdürmek üçin şert döretmek meselelerine aýratyn üns beriler. Şeýle hem, bu strategiýa iş berijiler bilen işjeň aragatnaşygy saklamagy we bilim edaralarynyň global üýtgeşmeler şertlerinde ýurduň ykdysadyýetini özgertmek işine gatnaşmagy göz öňünde tutýar.
Tegelek stoluň netijeleri innowasiýa ykdysadyýetini ösdürmäge we çalt depginli üýtgeýän dünýäde işlemäge taýyn hünärmenleri taýýarlamaga gönükdirilen täze bilim başlangyçlarynyň emele gelmegi üçin esas bolar. Gatnaşyjylar bilim edaralarynyň ýanynda işewürlik inkubatorlarynyň döredilmeginiň we startap-başlangyçlarynyň ornaşdyrylmagynyň bilim bilen bazaryň arasyndaky baglanyşygy güýçlendirjekdigini, uçurymlaryň bäsdeşlige ukyplylygyny ýokarlandyrjakdygyny we Türkmenistanda ykdysadyýetiň we tehnologiýalaryň ösmegi üçin täze mümkinçilikleriň döretjekdigini bellediler.
Salgy (education.gov.tm) : Türkmenistanyň Bilim Ministrligi
