“Ýaşlar öňe barýar batly gadamlar bilen” atly aýdym-sazly býramçylyk çäresi
Geçirilen senesi: 07.11.2024
Ýakynda Beki Seýtäkow adyndaky Mugallymçylyk mekdebinde “Ýaşlar öňe barýar batly gadamlar bilen” atly aýdym-sazly baýramçylyk çäresi geçirildi.
Çäräni gurnaýjylar Türkmenistanyň Magtymguly adyndaky Ýaşlar guramasynyň Daşoguz welaýatynyň Daşoguz şäher, Şabat we Görogly etrap Geňeşleri. Çärä Beki Seýtäkow adyndaky Mugallymçylyk mekdebiniň mugallymlary we talyp ýaşlary gatnaşdylar.
Baýramçylyk çäresinde Türkmenistanyň Magtymguly adyndaky Ýaşlar guramasynyň Daşoguz welaýatynyň Daşoguz şäher Geňeşiniň guramaçylyk bölüminiň esasy hünärmeni Gulmyradowa Jennet, Daşoguz welaýatynyň Görogly etrabynyň 41-nji orta mekdebiniň mugallymy, ilkinji Ýaşlar guramasynyň başlygy Allabaýewa Patma, TMÝG-niň Daşoguz welaýatynyň Şabat etrap Geňeşiniň guramaçylyk bölüminiň esasy hünärmeni Haýtanowa Şeker, Beki Seýtäkow adyndaky Mugallymçylyk mekdebiniň mugallymy, ilkinji Ýaşlar guramasynyň başlygy Omarowa Güljemal, Beki Seýtäkow adyndaky Mugallymçylyk mekdebiniň mugallymy, Türkmenistanyň Ýaşlar baýragynyň eýesi Murzaýewa Bossan, Beki Seýtäkow adyndaky Mugallymçylyk mekdebiniň mugallymy Saparow Serdar, Beki Seýtäkow adyndaky Mugallymçylyk mekdebiniň 2-nji ýyl talyby Saparow Serdar dagylar çykyş etdiler.
Çykyş edenler Türkmenistanyň Magtymguly adyndaky Ýaşlar Guramasynyň döredilmeginiň 33 ýyllygy, bu guramanyň alyp barýan işleri, ýaşlaryň ähli taraplaýyn ukyp-başarnyklaryny ýüze çykarmakda ýylyň-ýylyna yglan edilýän bäsleşikler dogrusynda belläp geçdiler. Ýaşlar diňe döwletimizde däl, eýsem tutuş dünýäniň ýüzünde birnäçe üstünlikleri gazanyp, Watanymyzyň at-abraýyny arşa galdyrýarlar. Ýurdumyzda ýaşlara aýratyn ynam bildirilýär. Watanymyzyň geljegi bolan ýaşlar üçin Hormatly Prezidentimiziň atalyk aladalaryna öz alkyş sözlerini aýtdylar.
Baýramçylyk çäresinde Beki Seýtäkow adyndaky Mugallymçylyk mekdebiniň “Bagtyýar ýaşlyk” medeni merkeziniň aýdymçylarynyň ýerine ýetirmeginde birnäçe aýdymlar ýaňlandy.
Dabaranyň ahrynda Mugallymçylyk mekdebiniň mugallymlary we talyp ýaşlaryna Türkmenistanyň Magtymguly adyndaky Ýaşlar Guramasynyň ýadygärlik sowgatlary gowşuryldy.
Beki Seýtäkow adyndaky Mugallymçylyk mekdebiniň
türkmen dili we edebiýaty mugallymy,
Bossan Murzaýewa
