Ýaşlarda hünär başarnyklaryny kemala getirmek
Häzirki zaman bilim ulgamynyň talaplaryna görä ýörite orta hünär mekdeplerinde geljekki mugallymlary taýýarlamakda oňyn netijeleri gazanmak üçin, ýörite hünär ugry boýunça talyplary taýýarlamak möhümdir.
Ýaş nesillerde maglumat giňişligini özbaşdak dolandyrmak başarnygyny kemala getirmek zerurdyr. Talyplaryň döredijilik başarnyklarynyň, özbaşdak pikirlenmek endikleriniň bolmagy üçin tehnologiýalary ulanmak arkaly amaly tejribelik işlerini özbaşdak ýerine ýetirmek hasda netijeli bolýar. Geljekki mugallymlaryň hünär başarnyklarynyň kemala gelmeginde özbaşdak işlemek usuly netijeli hasaplanýar. Özbaşdak işler mugallymyň ýolbaşçylygynda amala aşyrylýar. Ol işler talybyň meýilnamalaşdyrmagynda ýerine ýetirilýär. Mugallym talyby bu işe gönükdirýär.
Mugallymlaryň iş tejribesini artdyrmakda ,,Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy” uly ähmiýete eýedir.
Hünärmenleri taýýarlamakda okuw işi umumy okuw, amaly tejribe sapaklary, seminar okuwlary arkaly amala aşyrylýar. Okuw işleriniň bu görnüşleri olara öý we özbaşdak işleri ýerine ýetirmäge şert döredýär. Talyplarda bilimleleri, başarnyklary barlamak endigini kemala getirmek özbaşdak ýerine ýetirilýän işlere esaslanýar. Umumy nazary okuwda talyplara edebiýatlar, çeşmeler hödürlenýär we olar bilen işlemegiň usullary düşündirilýär. Tema özleşdirilende edebiýatlara salgylanmagyň usuly mümkinçilikleri barada aýdylýar. Okuw döwründe talyplaryň özleşdirýän maglumatlaryny çuňlaşdyrmak maksady bilen çözgütleriň, jogaplaryň iň oňaýlysyny saýlap alar ýaly seminar we taslama ýumuşlary hödürlenýär. Talyplaryň saýlap alan hünäri boýunça olara ýar dam bermek üçin işler öwrediji häsiýete eýe bolýar. Halypa mugallymlar talyplaryň referatlaryny, ýyllyk işlerini, tejribe işleri ýerine ýetirmäge usuly görkezmeleri, türgenleşdiriji ýumuşlary taýýarlap berýärler we goşmaça peýdalanmaga degişli edebiýatlaryň, çeşmeleriň sanawyny görkezýärler. Özbaşdak işiň tejribelikde ulanmaga ýaramly bolmagy üçin ugrukdyrýarlar. Şeýlelikde, mugallym döwrebap hünärmenleri taýýarlamakda döredijilikli iş alyp barýar.
Şeker ARAZBERDIÝEWA,
Beki Seýtäkow adyndaky Mugallymçylyk mekdebiniň mugallymy.
Mugallymlar gazeti, № 7. 2025-nji ýylyň 22-nji ýanwary.
