Garward uniwersiteti barada gyzykly maglumatlar
Gahryman Arkadagymyz ABŞ-da iş saparynyň çäklerinde “Al-Arabiýa” teleýaýlymyna beren interwýusynda Arkadag şäherinde ýöriteleşdirilen iňlis mekdebiniň açyljakdygy barada şeýle diýdi: “Ýakynda gurlan täze “akylly” Arkadag şäherinde häzirki zaman bilim usullary we standartlary boýunça okadyljak ýöriteleşdirilen iňlis dilli mekdebini açmagy meýilleşdirýäris. Möhüm hem bellemeli zatlaryň biri: okuw prosesi ABŞ-nyň gowy uniwersitetlerinde, ýagny Garwardda, Massaçusets tehnologiýa institutynda, Kolumbiýa uniwersitetinde okuwlary dowam etdirmäge mümkinçilik bermeklige gönükdiriler”.
Bu habar ýaş nesli buýsandyrdy, guwandyrdy. Biz hem ABŞ-nyň iň abraýly ýokary okuw jaýlarynyň biri bolan Garward uniwersiteti hakynda gyzykly maglumatlary siziň dykgatyňyza ýetirýäris.
Garward uniwersiteti diňe bir okuw mekdebi däl, eýsem ol üstünligiň, taryhyň we intellektual güýjüň simwolydyr.
Garward – diňe bir uniwersitet däl, eýsem bir fenomen, 1636-njy ýylda düýbi tutulan Garward, ABŞ-nyň iň köne we dünýäniň iň abraýly ýokary okuw mekdepleriniň biridir. Emma onuň diwarlarynyň aňyrsynda diňe bir kitaplar däl, eýsem örän gyzykly syrlar we adatlar ýatyr.
"Üç ýalan" heýkeli
Garwardyň merkezinde Jon Garwardyň heýkeli bar. Talyplar oňa "Üç ýalan heýkeli" diýýärler, sebäbi:
Heýkelde "Esaslandyryjy" diýlip ýazylan, emeli Jon Garward esaslandyryjy däl-de, diňe uly maddy kömek beren adamdyr.
Heýkelde uniwersitetiň esaslandyrylan ýyly 1638 diýlip görkezilen, emma aslynda 1636-njy ýyl.
Heýkelde görkezilen keşp Jon Garwardyňky däl, sebäbi onuň hiç hili suraty saklanyp galmandyr (skulptor şol wagtky bir talybyň keşbini ulanypdyr).
Talyplaryň arasynda synaglardan öň heýkeliň çep aýagyna degseň, şowhun getirýär diýen yrym bar.
Dünýäniň iň uly akademiýa kitaphanasy
Garwardyň kitaphana ulgamynda 20 milliondan gowrak kitap bar. Bu dünýädäki iň uly hususy we akademik kitaphana hasaplanýar. Eger siz şol kitaplaryň ählisini biri-biriniň yzyndan düzseňiz, onuň uzynlygy, takmynan, 90 kilometre ýeter.
"Dünýäni dolandyrýanlaryň" mekany
Garwardyň uçurymlarynyň sanawy haýran galdyrýar:
8 sany ABŞ prezidenti (şol sanda Barak Obama, Jon Kennedi, Franklin Ruzwelt).
160-dan gowrak Nobel baýragynyň eýesi.
Milliarderler mekany: Bill Geýts we Mark Sukerberg hem şu ýerde okapdyrlar (emma ikisi hem okuwyny taşlap, öz imperiýalaryny gurmaga gidipdirler).
Mugt okuw mümkinçiligi (Garaşylmadyk hakykat!)
Köp adam Garwardy diňe "baýlaryň okuwy" diýip pikirlenýär. Emma Garwardyň maliýe kömegi syýasaty örän üýtgeşik:
Eger talybyň maşgalasynyň ýyllyk girdejisi $85000-dan az bolsa, okuw, ýatakhana we iýmit doly mugt.
Talyplaryň 20%-den gowragy hiç hili töleg tölemeýär. Garward baý talyplary däl, iň zehinli talyplary gözleýär.
"Annenberg Hall" we Garri Potter
Uniwersitetiň birinji ýyl talyplarynyň naharlanýan zaly bolan Annenberg Hall edil Garri Potter filmindäki "Hogwarts" naharhanasyna meňzeýär. Beýik potoloklar, witraž aýnalar we taryhy portretler talyplara özlerini jadyly dünýäde ýaly duýmaga kömek edýär.
Garwardyň iň uly syry diňe bir taryhynda däl, eýsem onuň talyplaryna berýän "çäksiz mümkinçilikler" düşünjesindedir. Ol ýere girmek kyn, ýöne mümkin däl däl. Iň esasy zat — diňe akylly bolmak däl, eýsem dünýäni üýtgetmäge bolan höwesdir.
Umyt Baýramalyýewa,
Beki Seýtäkow adyndaky Mugallymçylyk mekdebiniň
türkmen dili we edebiýaty mugallymy
